បាត់ដំបង៖ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានលើកឡើងពីជ័យជំនះរបស់គណបក្សប្រជាជនកម្ពុជាក្នុងការបោះឆ្នោតកាលពីថ្ងៃទី២៣ ខែកក្កដាកន្លងទៅថាជាសក្ខីភាពបង្ហាញនូវការគាំទ្ររបស់ប្រជាពលរដ្ឋចំពោះគោលនយោបាយរបស់គណបក្សប្រជាជនកម្ពុជា និងការគាំទ្រសម្ដេចតេជោ ហ៊ុន សែន និងលោកកិត្តិទេសាភិបាលបណ្ឌិត ហ៊ុន ម៉ាណែត ដើម្បីដឹកនាំប្រទេសកម្ពុជាធានារក្សានូវសន្តិភាព និងការអភិវឌ្ឍនានាជាបន្តទៀត។

លោកថ្លែងបែបនេះក្នុងពេលសំណេះសំណាល និងថ្លែងអំណរគុណដល់សមាជិក សមាជិកា គណបក្សប្រជាជនកម្ពុជា នៅឃុំរកា និងនៅឃុំកំពង់ព្រៀង ស្រុកសង្កែ ខេត្តបាត់ដំបង ព្រឹកថ្ងៃអាទិត្យ ទី១៣ ខែសីហា ឆ្នាំ២០២៣នេះ។

ក្នុងឱកាសនោះលោកបានសម្ដែងនូវទឹកចិត្តសោមនស្សរីករាយក្រៃលែង និងសូមថ្លែងអំណរគុណយ៉ាងជ្រាលជ្រៅចំពោះទឹកចិត្តស្រឡាញ់របស់ប្រជាពលរដ្ឋឃុំកំពង់ព្រៀងទាំងអស់ ដែលតែងតែជឿជាក់មកលើគណបក្សប្រជាជនកម្ពុជា។

លោកក៏បានថ្លែងអរគុណផងដែរ ចំពោះការខិតខំប្រឹងប្រែងកន្លងមករបស់ក្រុមការងារគណបក្សចុះមូលដ្ឋានឃុំរកា និងឃុំកំពង់ព្រៀង។

ទន្ទឹមនឹងនេះ ប្រធានគណៈកម្មាធិការសិទ្ធិមនុស្សរូបនេះ ក៏បានលើកឡើងនូវសមិទ្ធផលជាច្រើននៅក្នុងឃុំទាំងពីរដែលកើតចេញពីកម្លាំងសាមគ្គីរបស់ក្រុមការងារ អាជ្ញាធរ និងប្រជាពលរដ្ឋ មានជាអាទិ៍ ការស្ដារនិងការជួសជុលឡើងវិញនូវផ្លូវ នៅក្នុងភូមិ-ឃុំ និងប្រឡាយទឹក ការជួយកសាងរបងសាលា វត្ត ការជួយឧបត្ថម្ភជនក្រីក្រ ជនរងគ្រោះពីទឹកជំនន់ ពិសេសការសាងសង់ស្នាក់ការគណបក្សប្រជាជនកម្ពុជាឃុំកំពង់ព្រៀង។

ជាចុងក្រោយនេះ លោក កែវ រ៉េមី បានលើកទឹកចិត្តឱ្យក្រុមការងារ គណៈកម្មាធិការបក្សឃុំ មេឃុំ ក្រុមប្រឹក្សាឃុំ មេភូមិ មេប៉ុស្តិ៍ និងក្រុមចលនាយុវជនឃុំ សូមបន្តការងារបម្រើ និងជួយដល់ប្រជាពលរដ្ឋក្នុងនាមជាគណបក្សឈ្នះឆ្នោតដែលមានការគាំទ្រពីប្រជាពលរដ្ឋ និងសូមបង្កើននូវប្រសិទ្ធភាពការងារខ្ពស់បន្តទៅមុខ៕